RSS

Wednesday 12 December 2012

~~ ဆယ့်နှစ်လ ဆယ့်နှစ်ရက် နှစ်ထောင်ဆယ့်နှစ်မှသည် ကျူးရင့်မော်ကွန်းဖြင့် ထူးတင့်အောင် သမိုင်း တွင်ရစ်စေမည့် ပြည့်အကျိုးဆောင် ချစ်ညီငယ် အပတ်စဉ် ၅၁ ဗိုလ်ကြီးများသို့ ~~




 
 











 နေခြည်ထွန်းသစ်ပါလို့
 ရွှေရည်သွန်းပက်စီခြယ်…
ဘုန်းလှစ်ကယ် အစဉ်မြဲသာသမို့
လက်ဝဲယာ ပုခုံးတစ်ဖက်ချက်မှာလ
သုံးပွင့်ကြယ် လင်းလက်ဖြာ
ညွန်းလျက် စာကဗျာသီပြန်တော့
ရည်သန်စိတ်အားမာန် ဇွဲကိုရင်းလို့
ပြည်မြန်တစ်ခွင် တပါးရန် နွှဲဖြိုခွင်း
အလင်းဖြန့် ပြည့်အားအင်သစ်မို့
သမိုင်းကြောင်းမှာ ကမ္မည်းတွင်ရစ်
သြော်.. ချစ်ညီငယ်  အပတ်စဉ် ငါးဆယ့်တစ်။

အတိတ်ကို တဖန် လွမ်းသမျှ တမ်းတပါလိမ့်
စိန်ပန်းပြာ ချယ်ရီလန်းပါလို့
မြေညီသွယ် အမိမြေစခန်းမှသည်
အသိ အဆွေ အကျွမ်းရယ်နှင့်
တစ်လမ်း တစ်နှယ်စီ ရွက်လွှင့်
လက်ဆင့်ကမ်း တာဝန်တစ်ယောက်တလက်ဝယ်
တွေးရက် ဆွေးရက်ရယ်နှင့်
 (အခုတော့ဖြင့်……..)
အပေါင်းအသင်း ဆွေသဟာတို့ရေ
ကျောင်းဆင်း လေးနှစ် ပြည့်လေပြီ..။

အမှတ်တရရယ်ဖြစ်ရပါဘိ
ဆောင်းနှင်းအလယ် မြူနှယ်ရောယှက်
ကောင်းခြင်းငယ် ဇမ္ဘူဝယ်ထွန်းသစ်ပါတဲ့
ဆယ့်နှစ် ဆယ့်နှစ် သုံးခုထပ် မြတ်လှသည်မို့
တပ်မအစဉ်လာ ဆယ့်နှစ်ရပ်ရယ် ပေါင်းဖက်
မပြတ် ရင်လွှာ ကမ္မည်း ထပ်လောင်းပါလို့
စစ်နည်းအတတ်ဗျူဟာ အဖြာဖြာနှင့်
ပြည်မြန်မာ အဖျက်ရန်ပိုး
တိုက်စစ်ရယ်ထိုးလို့သာဆင်
အမျိုးဘာသာတွင် ကာကွယ် သတိရယ်နှင့်
တို့မြန်မာသာ လာ မထိလေနဲ့
ကမ္ဘာသိအောင် သတ္တိ ထွန်းပြောင်ပြ
မြန်မာ့ဂုဏ်ရောင် ဘယ်မညှိုးအောင်ပ
ပြည်အကျိုးဆောင် ရည်ရွယ်စိတ်ထားရယ်နှင့်
ချစ်ညီငယ်တို့ရေ..
ပြည်သူ့က ဖွား .. ပြည့်သူ့သားရယ်မို့
ပြည်သူကချစ် …ပြည်လည်းချစ်သမို့
ပြည်ချစ် ပြည့်သား  ပြည့်အားအင်မို့
မြေပြင် ရေပြင် ဝေဟင် အောင်လံ မြူးဝင့်
ကျူးရင့် မော်ကွန်းသမိုင်း တံခါးရယ်ဖွင့်လှစ်နိုင်ပါစေ..။

ချစ်ညီလေးတို့ရေ…
သည်အတွေးနော် ဂုဏ်ပြုစကားရယ်နှင့်
ပြည်အရေးမျှော် တက်နေအလားသို့ မြင့်မားတာဝန် ကျေပွန်နိုင်ပါစေ…။

၁၂ရက် ၁၂လ ၂၀၁၂ခုနှစ်… တစ်ယောက်တစ်လက် သုံးပွင့်ကြယ်အဆင့်မှသည်
ရာထူး အဆင့်ဆင့်မြင့်  ပြည်အကျိုးအတွက်  ဆက်လက်ထမ်းရွက်နိုင်ပါစေ..။

ဂုဏ်ပြုခြင်းအမှတ်တရ-

                               ရွှမ်းသိင်္ဃ (တနင်္သာရီ)
                                   (၁၂-၁၂-၂၀၁၂)
                                   (ဆန္ဒပြည့်ဝပါစေ)














Sunday 25 November 2012

ဆေးပေါင်းခတဲ့ တန်ဆောင်တိုင်ည
















ငွေနှင်းမှုန် ဖျန်းပက်ကြဲ
ပန်းပွင့်ခ၀ဲတို့ ဖူးစချီ
လရာသီ ဗြိ စ္ဆာ မို့ 
 ကြိတ္တိကာ တာရာမင်း
ပြိုင်တူငယ်လင်း..။

နက္ခတ်ငယ် စုစုံညီ
ပုဏ္ဏမီ စန်းလရောင်ဆမ်း
ချမ်းစ တန်ဆောင်ဆောင်းလေညှင်းက
တိုက်ခတ်ဆော်သွင်း။

မြူနှင်းငယ်ခွင်းပါလို့
ကြူသင်းကြ ပန်းမယ်ဇလီ
မှန်းရွယ်ရည် ဘေးဘယာကင်းဖို့
အဖော်တသင်းဖွဲ့ ခူးကာပြုတ်
အဖူးငယ် သုပ်စားခဲ့ကြ
ဆေးပေါင်းတို့ရယ် ခ…။

မောင်ဖုန်းတို့အတွက်မှာဖြင့်
တန်ဆောင်းမုန်းလပြည့်ရက်ရယ်က
ပျော်စရာ လရာသီငယ်မို့
ညအခါအမီ မကုန်ချင်း
တအုပ်တမင်းဖွဲ့ တီးတိုးကစားကြ
သြော်.. ကျီးမနိုးတဲ့ ည..။

ရွှမ်းသိင်္ဃ (တနင်္သာရီ)
(၂၅-၁၁-၂၀၁၂)
(တန်ဆောင်မုန်းလ အတွက် အမှတ်တရ)

Sunday 28 October 2012

သီတင်းကျွတ်တဲ့ချိန်












ရေလွှာဖြန့်ကာပ
ရွှေကြာရနံ့ဖြာသင်း
စန္ဒာလမင်းရယ်က
ဝင်းပ ထိန်လင်း..။

ရာသီ တူလရယ်မို့
ဝဠာဆီ တိမ်မှောင်ရှင်း
အခါမီ မြူနှင်းရယ်ကျ
မိုးလရယ် ကင်း..။

ဝါလလည်း ကင်းလွတ်
သီတင်းကျွတ်တဲ့ချိန်
အလင်းရယ် တူယှဉ်ထွန်းကြ
ရွှန်းမြရောင်စုံမီးက ထိန်..။

မောင်နှမ မိသားရယ်တို့
ကြည်မြခြယ် အပြုံးချိုမြိန်
ကန်တော့ပန်းရယ် ဆင်လေတော့
ချစ်စရာ့ ငါတို့ အိမ်...။

ရွှမ်းသိင်္ဃ (တနင်္သာရီ)
(၂၈-၁၀-၂၀၁၂  သီတင်းကျွတ်လ အမှတ်တရ ကဗျာ)









Thursday 4 October 2012

ဆရာ့စေတနာပွင့်ပန်း










~~ ကြင်နာခြင်းများစွာ
အစဉ်လာ မယွင်း ပါတဲ့
ဆရာ့စေတနာပန်း
မြေကမ္ဘာ ထူးတင့်စေဖို့
ဝေဆာကာ ဖူးပွင့်လို့လန်း..။ ~~~

   ရွှမ်းသိင်္ဃ (တနင်္သာရီ)
( အောက်တိုဘာလ ၅ရက်နေ့ ကမ္ဘာ့ဆရာများနေ့ ကို ဂုဏ်ပြုသည်..။)

Tuesday 25 September 2012

မျှော်ရင်း တမ်းတ ရသော တော်သလင်း လ















ပန်းယင်းမာ ပွင့်ဖြာလန်းဝေတော့
ထက်ကမ္ဘာ တစ်စခန်း တစ်မြေမှ
ချစ်စရာ့ မြန်ပြေ နန်းကိုဖြင့်
ကျွန်ုပ် ရွှမ်းမှာလေဗျ..
မှန်းဆမိချေပြီ…။

မျှော်ရက်တွေကြာရော့ပေါ့
လှော်တက်ကယ်နှင့်
ကွန်ယက်ခြယ် နဂါးလှလှေငယ်တို့
အများအားကျစေ  မာန်ချီသွင်းပါလို့
မြစ်မင်းငယ် နဒီတွင်းမှာလ
လှေပွဲသဘင်ခင်း..။

အဖော်မစုံသူအတွက်မှာဖြင့်
မျှော်ရုံမူ လွှဲလို့ပ
သရဲ တစ္ဆေတသင်းရယ်တို့
ကင်းလွတ်တဲ့လရယ်မို့
ကျွတ်ဘ၀ ရစေဖို့ရည်
ဆုတောင်းခြွေ အမျှတန်းဝေကြ
ခွန်းသရပ် ညရယ်နှင့်
မျှော်ရင်းတမိပါရဲ့
သြော်.. တော်သလင်းလ…။

  ရွှမ်းသိင်္ဃ (တနင်္သာရီ)
( ၂၅- ၉-၂၀၁၂)
(တော်သလင်းလ ခွန်းသရပ်ညသို့ အမှတ်တရ)

Friday 24 August 2012

အချစ်စစ်













ရေမြေပျက်ပြုန်း 
ကမ္ဘာသုဉ်းလည်း
မဆုံး မြဲတိုင်.. မေတ္တာပြိုင်လို့
မယိုင်မလဲ သစ္စာမြဲမယ်..
ချစ်ရက်တာတွေ ရှည်စေသော်ဝ်.. 
ချစ်မေတ္တာတွေ တည်စေသော်ဝ်..။

  ရွှမ်းသိင်္ဃ (တနင်္သာရီ)
 (၂၄-၈-၂၀၁၂) 






 

Monday 20 August 2012

ဝါခေါင်လအလှဖွဲ့













ခတ္တာခိုင် လှိုင်ကာထူးလို့
အပြိုင်ဖူးတဲ့ သိဟ်ရာသီ..။

ရှစ်ခွင်ညီ အုံ့မှိုင်းရီသမို့
တိမ်လွှာညီ မည်းမှောင်ချီ..။

ရောင်နီငယ် မခို့တရို့နှင့်
မို့မို့ကယ် ဆွေး ရင်စို့ပြီ..။

တဖောင်ဖောင် ရေတွေကြီး
တလှေကြီး ပျော်ကြစုံညီ..။

ဝဠာဆီ တိမ်ချင်းယှက်လို့
အခါမီ မိုး ပုလဲဆင်သည်..။

ရွှင်ကြည် စိတ်အလှရယ်နှင့်
ဘ၀င်တည် မပစ်ကွာမှန်းရွယ်လို့
မေတ္တာဓာတ်ရယ် ခြုံလွှမ်း။

အဖူးမှာ အငုံဆင့်ပါလို့
လရာသီ ၀ါခေါင်ဦးမှာ
မြူးကြွရွှင်လန်း..။

ရွှမ်းသိင်္ဃ (တနင်္သာရီ)
(၂၀- ၈-၂၀၁၂)
 
( ၀ါခေါင်လ အမှတ်တရ)





Monday 13 August 2012

သွေးစွန်း နှင်းဆီ
















 
ရိုးတံငယ်သစ် 
ရွက်ထစ်ထစ်ပိုင်းရယ်နှင့်
အခက်သစ်ကိုင်းဖူးမှာ
ဝိုင်းလျက်ကယ်..ဆူး..။

အဖူးမှာ အငုံငယ်ဆင့်
ထုံသင့်ရနံ့ဦးကိုဖြင့်
တပ်မက်ရင့်ကျူး
အရူးမူး နမ်းမိပြန်တော့
သွေးစက်ထွက်..စူး။ 


ရွှမ်းသိင်္ဃ (တနင်္သာရီ)
(၁၃-၈-၂၀၁၂)

(နှင်းဆီ ချစ်သူ သို့ အမှတ်တရ)
                     



Friday 3 August 2012

ရွှေရင်ခုန်လို့ လွမ်းလှပြီ















ပန်းနုရောင် နှုတ်ခမ်းသွေးရယ်နှင့်
အနမ်းလေးပေးခဲ့ဖူးပြီ..။


အလှမ်းဝေးမယ်မှန်းကြိုသိရင်ဖြင့်
ငိုမိမယ့် အဖြစ်သနဲ့ငယ်
ချစ်ရက်ကယ် မဆွေးချင်ပြီ..။


အတွေးပင်လယ် ရေယဉ်ကြောမှာ
မျှောချင် မျှောပါစေတော့
အပြောကျယ် ဘ၀တောမှာဖြင့်
(တွေးရက် ဆွေးရက်ရယ်နှင့်)
သြော်.. ရွှေရင်လည်း မောလှပြီ..။


သဘောရယ်ဖြူ မနောတူရင်ဖြင့်
ရင်ချင်းအပ် အသဲ နှစ်လွှာထပ်လိုက်ချင်ဘိ
အနာဂတ် ပြန်ဆုံမယ့်ရက်ကိုလေဗျ..
ရွှေရင်ခုန်လို့ လွမ်းလှပြီ..။



ရွှမ်းသိင်္ဃ (တနင်္သာရီ)
(၃-၈-၂၀၁၂)

( အဝေးရောက်ချစ်သူ များသို့ အမှတ်တရ...)

Wednesday 1 August 2012

မြတ်သော လ၀ါဆို














ပြုံးလျက်ကယ် အတူယှဉ်ဖူးပါလို့
ဘုန်းလှစ် ပုန်းညက်ပွင့်ရယ် သင်းချို
သန္ဒေ တောထွက် အမှတ်သားငယ်နှင့်
ဓမ္မစက်ဟောခဲ့ လမြတ်ဝါဆို..။

သည်ချိန်ခါရောက်ရင်ဖြင့်
 စေတနာ သဒ္ဒါ ရွှင်ကာလန်းသမို့
ရွှေကြာညို အသွင်ဆန်းရယ်နှင့်
ဝါဆိုသင်္ကန်းကပ်ကြသကို..။

ဒုက္ခငယ် သံသရာစက်ကွင်းရယ်မှ
မြန်မကွာ လက်ငင်း
ချက်ချင်း ကင်းခွာစေဖို့
 မှန်းကာဆ လှမ်းကြွချီ
မဂ်နိဗာန်ဆီ
အဓိဌာန်တည် စိတ်ရည်မှန်းလို့
သည်စခန်း သည်သာသနာ သည်ဝါတွင်းမှာလ
ညီညာကာ ပေါင်းစု နွှဲတူသမို့
အလှူဒါန်း မြတ်ကုသိုလ် အထိုထိုရယ်နှင့်
သြော် .. မြတ်သော လ၀ါဆို..။


ရွှမ်းသိင်္ဃ (တနင်္သာရီ)
(၂-၈-၂၀၁၂)

( ၀ါဆိုလပြည့်နေ့ (ဓမ္မစကြာ အခါတော်နေ့) အမှတ်တရ)


















Saturday 28 July 2012

ကံဇာတ်ရေးတဲ့ ယဉ်ကျေးခြင်း အနုပညာ













ချမ်းမြေ့စွာ ကြည်နူးခြင်းဘ၀
စိုးရွံ့စွာ ခြောက်လန့်ခြင်းဘ၀
နာကျည်းစွာ မုန်းတီးခြင်းဘ၀
ငြိမ်းချမ်းတဲ့ဘ၀
စိမ်းလန်းတဲ့ဘ၀
သူစိမ်းဆန်တဲ့ဘ၀
ကဗျာဆန်တဲ့ဘ၀
မဟာဆန်တဲ့ဘ၀
လူမသိ သူမသိ ဘ၀
ပြဇာတ်လား ဟာသလားမှန်းတောင် မသိတဲ့ဘ၀
သေချာတာက ငိုကြွေးခြင်းနှင့် အဆုံးသတ်ကြတာများတဲ့ဘ၀တဲ့..။
ငြိစွန်းမိရင် ရုန်းမထွက်ဖို့ခက်မှန်းသိတဲ့ ဘ၀
အချက်ပြထားရင်းက လောကပင်လယ်ထဲ
ညင်ညင်သာသာလေး လွှင့်စင် သက်ဆင်းခဲ့ကြတယ်..
ကမ္ဘာ့အမှောင်မိုက်ဆုံး ညတစ်ညမှာ
အထီးကျန်ခြင်းကင်းတယ်လို့သာပြောကြတဲ့
လူလူသူသူ ပြုံးရီဖို့တောင် အချိန်မရှိတဲ့ ဘ၀တွေကြား
မော်တပ်တပ်ထားသမျှ သွက်သွက် ခြေလှမ်းတွေနှင့်
တက်လိုက် ဆင်းလိုက် လျှောချလိုက်နှင့် ခရီးဆက်ကြတယ်..။
ပြောလို့ မဆုံးသေးခင်ပဲ .. ငိုလိုက်ကြတာ
မိုးဘယ်အချိန်ရွာမယ်ဆိုတာ မခန့်မှန်းနိုင်ပေမယ့်
တဖြည်းဖြည်း လူရိပ် လူကဲ ကြည့်တတ်လာတယ်..
ကံဇာတ်ချရာ ဈာန်ဝင်ရင်းက
ဘယ်ဝင်ညာထွက် သွေးထွက်အောင်မှန်ဖို့ရာ
ယုံကြည်မှု ၁ရာခိုင်နှုန်းတောင် ရှိဖို့ နည်းလာတော့
တခါတလေ...
ဘေးစကားလည်း နားယောင်ချင်မိတယ်..။
ကျန်းမာစွာ ပျော်ရွှင်ခြင်း
အဆင်ပြေစွာ ပျော်ရွှင်ခြင်း
အောင်မြင်စွာ ပျော်ရွှင်ခြင်း
ရဲရင့်စွာ ပျော်ရွှင်ခြင်း
ဆန္ဒပြည့်စွာ ပျော်ရွှင်ခြင်း
ပြီးပြည့်စုံစွာ ပျော်ရွှင်ခြင်း
သူ့တပါးမျက်ရည်များ
သူ့တပါးကြေကွဲမှုများ
သူ့တပါး ရှုံးနိမ့်မှုများ
သူ့တပါး ဦးခေါင်းတွေပေါ် ခြေစုံနင်းခတ်ပြီးမှ
ပျော်ရတာကိုမှ ပျော်ရွှင်ခြင်းတဲ့လား..
နောက်ဆုံးတော့လည်း
ကြေးစည်ထုလို့ ခွေးအူသံကြားမှ
မာနတွေ ချ .. နောင်တတရားတွေအကြား လူးလိမ့်ဖို့ စေ့ဆော်ပြန်ရော
အငွေ့သက်လေးက လွတ်လပ်စွာ ပျံသန်းဖို့တောင် အားအင်ချိရတဲ့အဖြစ်..
လေပွေထဲ ဘယ်သို့ဘယ်မျှ လွှင့်မျောဦးမယ်မသိ..။
ကိုယ်ဘာသာ ကိုယ် လက်ညွန်းငေါက်ငေါက် ထိုးရင်း
တောက်...တစ်ချက်ခေါက်ပြီး ဆုံးမတတ်လာတယ်..။
ဘယ်လောက်ထိလဲဆိုတော့........
မြေကြီးပေါ် ကျကြွေတဲ့ ရော်ရွက်ဝါလေးကိုတောင်
တက်နင်းဖို့တောင် ၀န်လေးမိနေလေရဲ့..။


ရွှမ်းသိင်္ဃ (တနင်္သာရီ)
(၂၈-၇-၂၀၁၂)


Thursday 26 July 2012

ဝါဆိုလ အလွမ်း














ညှို့ဖွဲ့မာန်တိမ်လွှာငယ်
မိုးဝသန် ၀ါဆိုဦးရယ်မို့
မြူးနွဲ့ဟန်ကြည်။


မြေနုနု ကြွကြွ
ဖွဖွလေးရယ် မိုးစက်ကြွေ
တိုးထွက်နေ မှိုဖြူပွင့်ငယ်နှင့်
ပျိုမြစ်ငယ် ၀ါးနုဖူးမျှစ်တို့
ထူးတင့်လို့စည်..။


မြေလွှာအထက်လမ်းမှာဖြင့်
နေရာတကာ ပွင့်လန်းပါဘိ
 ရွှေပန်းငွေပန်းရယ် လင်း
သွယ်သွယ်ရနံ့ငယ်နှင့်
မွှေးပျံ့လို့သင်း။


ရာသီလရယ်နှင့်
အခါမီသမျှ မိုးခိုငှက်ပုံသို့
မိုးညိုရင် စိုးစိတ်ရယ်ဖိုမိသနဲ့
အကြိမ်ကြိမ် လွမ်းစိတ်ရယ်ပိုရပါတဲ့
စခန်းဌာနီ လှမ်းကွာလှသည်မို့
တမ်းတမိပြန်ရင်ဖြင့်
(အို..ဘယ့် ၀ါဆိုငယ်)
မှန်း ဆ စိတ်တင်း...။



ရွှမ်းသိင်္ဃ (တနင်္သာရီ)
(၂၆-၇-၂၀၁၂)

(၀ါဆိုလ အမှတ်တရ - ကဗျာလေးနှင့် ရာစုရဲ့ ၀ါဆို သီချင်းလေးကို ဖော်ပြပေးလိုက်ပါသည်..။ ခံစားနားဆင်ရင်း ၀ါဆို လွမ်းစိတ်များ ပြေလျော့နိုင်ပါစေ...။)






Wednesday 27 June 2012

အိုဘယ့်.. ၀ါဆိုမိုးငယ်














အခါကြိုတဲ့ သဘောရယ်နှင့်
သြော် .. ၀ါဆိုတဲ့ မိုးငယ်က
ညှိုးဖွဲ့ဖွဲ့ သည်းချေပြီ..။

မိုးပုလဲမြေစီ ခခြွေတော့
ပန်းတိမ်မနိုင် ပုန်းညက်တို့က
ပြုံးရက် အလှစီရီ
မြေမဟီ ထွန်းသစ် အခါမီမို့
သပြေသီးမှည့်ရယ်နှင့်
ရေကြီးတဲ့ ရာသီ။

ချောင်းတွေမှာ ရေလျှံသမို့
လောင်းလှေငယ်နှင့်
အပေါင်းဆွေမယ် လှော်ကြမြိုင်လို့
ပျော်ကြသည့် ပွဲ..။

အိုဘယ့် လ၀ါဆိုရယ်..
တိမ်လွှာငယ် မဲသထက် မဲ
မိုးတွေက သဲသထက်သဲ သမို့
ဘယ်ဆီဘယ်ညာ မျှော်ကာ လွှဲလို့
(အဖော်ကွာသူအတွက်မှာဖြင့်)
သြော်..လွမ်းစိတ်ကကဲ…။

                                    ရွှမ်းသိင်္ဃ (တနင်္သာရီ)
                                    (၂၇-၆-၂၀၁၂)

Tuesday 12 June 2012

အနုအရင့် အလှစုံနှင့် လမြတ်နယုန်
















လျှပ်ပန်းလျှပ်နွယ် တလက်လက်
ပျိုးပျိုးပျက်ပျက် 
ကောင်းကင်ထက်မယ်
တိမ်နီတိမ်နက် 
 ရောဖြာ ယှက်ချိန်
 တစ်စက် နှစ်စက် မိုးသေး
ဖျန်းပက်ပေးရင်
မြက်သားလည်းမွေး
လေပြေအေးသမို့
စံပယ် မုလေးနှင့်
 မြတ်လေးတို့   မွှေးကြည်
 ဆေးရေးပန်းချီလည်း
ခြယ်သမမီတဲ့
 ဝေစည်သွယ်လျ ရွက်သစ်နုတို့ 
အခက်လက်မှာစုတင့်ကြ
အနုအရင့်အလှအလယ်
ဖူးပွင့်ငယ် အစုံစုံနှင့်
အငုံ မယ် ညှာတံစိမ်းမြခြယ်
ယိမ်းသမသဖွယ် လှကြပုံကား
စာဖွဲ့ လည်း မကုန်
သြော်.. အခါသမယ လှမြတ်ငယ် နယုန်...။


ရွှမ်းသိင်္ဃ(တနင်္သာရီ)
  (၅-၆-၂၀၁၂)








Tuesday 22 May 2012

ရင်ခုန်မှု တစ်ဘက်တစ်ချက် အဝေး












 မျက်လွှာတစ်ချက်ပြမှ
ရင်ခုန်ခွင့်တခဏရတဲ့အဖြစ်
အရိပ်အမြွက်ပြရုံလေးနှင့်
ဝှက်ထားတဲ့ နှလုံးသားကို စီမံခွင့်ရပါ့မလား..။
တခါတခါ တွေးပူတတ်တဲ့အကျင့်နှင့်
အားနာတတ်တဲ့ ဓလေ့လေးတွေသာ မရှိရင်..
ညီမျှခြင်းရဲ့  တစ်ဘက်တစ်ချက်မှာ
ရလာဒ်ကောင်းတွေ ဖန်တီးခွင့်ရကောင်းရဲ့
စည်းတဲ့ ....
အဖြူရောင်အနောက်ခံမှာ နဲနဲနှင့် ပါးပါးလေး ဆေးခြယ်ခွင့်မရှိသေးခင်..
 ထပ်ထပ်ဝေးရဦးမယ်တဲ့...။
အသိနှင့်သတိတဲ့....
သိရက်နှင့်လည်း မိုက်ချင်သေးတယ်..
နောင်တနှင့် နဘမ်းသတ်ခဲ့တာလည်း အကြိမ်ကြိမ်
နှောင်ဖွဲ့  မဲ့ အငြိုးအတေးတွေအကြား
အခိုးအငွေ့ တွေအလား လွင့်ထွက်သွားတဲ့ မျှော်လင့်ချက်တွေကို
ညမှောင်ထဲ ထထကောက်ရတာက အမော..
အာခေါင်ပေါက်မတတ် ဆိုညည်းရတဲ့ လွမ်းတေးတွေသာ
အသက်ဝင်တဲ့ မှော်အတတ်သွင်းခွင့်ရမယ်ဆိုရင်
ဘယ်သို့ ဘယ်ချိန် ဘယ်နေရာ  ဘယ်ဘ၀... 
အဆုံးစမဲ့ အနန္တ အနန္တ ဖြင့်
ဆုံမှတ်တစ်နေရ အတည်တကျ ရချင်တယ်...။
ပလူပျံမတတ် ချစ်တံခါးတွေ ကို
အမုန်းမဲ့ သော့ချက်လေးတွေနှင့်သာ 
ကုဋေကုဋာ အသင်္ချာ ဖွင့်လှစ်ချင်ပြီ..။
ပုရစ်ဖူးလေးတွေသာ စကားပြောတတ်ရင်..
ဝေသမျှရာသီတိုင်းမှာ...
အလွမ်းတွေနှင့် မြေခခဲ့ရတဲ့ ဥပမေယျတစ်ခုဖြစ်စေမှာပါ..။
အချစ်တွေသာ ထပ်မစိမ်းလန်းချင်နေပါစေ..
ရှိရင်းစွဲအချစ်တွေ မညှိုးနွမ်းဖို့     
မက်မက်မောမော သတိရခွင့်လေးနှင့်
ရင်ခုန်မှု တစ်ဘက်တစ်ချက် အဝေးမှာ
လွမ်းတေးတွေ ဖွဲ့   ဆိုရင်း
တစ်နေ့ မှာ တစ်ကြိမ်တော့ ပွေ့   ဖက် ရှင်သန်နေပါရစေ..။

               ရွှမ်းသိင်္ဃ (တနင်္သာရီ)
                 (၂၃-၅-၂၀၁၂)




Wednesday 16 May 2012

အနာဂတ် မြန်မာပြည် အတွက် တွဲလက်များ


ကျူးရင့် မြူးဝင့် ငြိမ်းချမ်းရေးတေးရယ်နှင့်၊

ဖူးပွင့် ထူးတင့် စိမ်းလန်းပန်းဝေ၊
အမိမြန်ပြေ အနာဂတ်အရေး၊
အခါမလပ် ငေးမျှော်၊
အရှေ့တခေါ် မဝေးလှပြီမို့
တွေးပျော်ကာ အတူယှဉ်နွှဲဖို့
(သွေးရင်းညီနောင်ချစ်ဆွေတို့ရေ..)
တွဲလက်တွေ ခိုင်မြဲ။

                                                          ရွှမ်းသိင်္ဃ (တနင်္သာရီ)
    ( ၁၆-၅-၂၀၁၂)

(အနာဂတ် မြန်မာပြည် သီချင်းလေးကို နားထောင်ပြီး ကဗျာ အတွေး ပေါ်လာတာနှင့် အမှတ်တရ ရေးလိုက်ခြင်းသာ ဖြစ်သည်..။ သီချင်းလေးကို http://www.myanmarcelebrity.com/ မှ တဆင့် ဝေငှယူလိုက်သည်..။ ကဗျာ ချစ်သူတို့ သီချင်းလေးကိုလည်း နားထောင်ပြီး ကြည်နူးပျော်ရွှင်နိုင်ပါစေ..။) 

                           အနာဂတ် မြန်မာပြည် ( The Future Myanmar song)



Sunday 13 May 2012

အေးမြသော မေတ္တာပိုင်ရှင်




ဇမ္ဖူတိုင်းမှာ အဖြေညှိပြရင်
အပူလှိုင်းဖြာ ဝေဒနိကတွေနဲ့
လူတိုင်းမှာ အမေရှိကြတယ်။

မရေမရာ ပဟေဠိတွေကြောင့်
အသေအချာ အဖေမသိတောင်မှ
အမေရှိတယ်။

ချစ်သဒ္ဒါဝေကဲ
ပြည့်တန်ဆာအမေလည်းအမေ
အကြွေးကြွယ်လှတဲ့
ဈေးသည်မ အမေလည်းအမေ
အကြောင်းတရား အခြေမွဲ
သူတောင်းစားအမေလည်း အမေ

သားသမီးတွေ ကြီးပွားစေရာဘို့
စီးပွားအထွေထွေ
စိန်ရွှေပတ္တမြား အိမ်မြေကားနှင့်
ငွေသားအမွေ
ပေးနိုင်မှ အမေမဟုတ်။

ယိုင်နဲ့နဲ့တဲအတွင်း
လှဲအိပ်ခင်းစရာနေရာ တိုးဖယ်ပေးခဲ့
အရိုးဟင်းတစ်ဖဲ့စီဝေ
ထမင်းရည်အတူသောက်
ဗိုက်မှောက်တော့အတူတူ
(ခြင်ထောင်မရှိ ၊ ခြုံစောင်မရှိ
ခင်းအိပ်စရာ ဖျာလည်းမရှိလို့)

ခြင်ကိုသွေးလှူအတူတူ
ကြမ်းပိုးသွေးလှူအတူတူ
အပူကိုမျှဝေခံစား
ဒုက္ခကို ပိုမိုလေးနက်စေ။
ပညာအမွေရွှေအိုး
ရိုးသားမှုဂုဏ်သိက္ခာ
မေတ္တာအကြင်နာမှတပါး
အခြားပေးစရာ အထွေထွေမွဲသော်လည်း
အမေဟာအမေပဲလေ။



အရှင်ဇ၀န ( ရွှေပြည်သာ )
 
( ကဗျာလေးကို ကြိုက်လွန်းလို့     အမေများနေ့  အတွက် အမှတ်တရ ဝေငှလိုက်ပါတယ်...။  အမေအားလုံး ထာဝစဉ်နေကောင်းပါစေ...။)


 မနော ရဲ့   အမေ့သံစဉ်တေးရုပ်လွှာ



Saturday 12 May 2012

မယ်မယ်အတွက် (အမေများနေ့ အမှတ်တရ ဟိုက်ကု ကဗျာများ)





၁)  ချစ်ထုံးရယ်မပြယ်
      မေတ္တာဓာတ်လည်း သွန်းဆင့်ကြွယ်
      သားချစ်သော မယ်မယ်။



၂)   တုနှိုင်းရယ်မရ
      ချစ်ခြင်များလည်း ၀န်းရံခ
       မယ်မယ်ပေးတဲ့ ဘ၀။


 ၃)   ကြင်နာဓာတ်လွှမ်းခြုံ
      ရင်နှင့်ရင်း၍ ချစ်လိုက်ပုံ
      ညွှန်းစာဖွဲ့   မကုန်..။


၎)  ကြင်နာပန်းတို့   ဝေ
     ရင်မှာ နွမ်းသမျှ လျော့ပြေ
     မယ်မယ် ကိုယ်စိတ် ချမ်းမြေ့စေ...။
     
     


       ရွှမ်းသိင်္ဃ (တနင်္သာရီ)
(၁၃-၅-၂၀၁၂  အမေများနေ့ အမှတ်တရ--
ကမ္ဘာမှာရှိသော အမေများအားလုံး ထာဝစဉ် နေကောင်းကြပါစေ...။)

အမေများအတွက် အမှတ်တရ...။


 





Monday 7 May 2012

လမြတ်နွေ ကဆုန်


















ရွှေစကားပွင့်ရယ်နှင့်
မြေသားလည်းတင့်ချိန်
ပွင့်ထိန်ထိန် ပန်းအင်ကြင်းတို့
ရနံ့ထုံသင်းကြည်
ရာသီမှာ အခါပြိဿ
'ဗျာဒိတ်ပြ ဖွားမြင်၊
ဗောဓိပင်၊ စံဝင် နိဗ္ဗာန်နန်း'ရယ်ဟု
စိတ်မှာမှန်းရွယ် နောင်ရှည်ထွန်းဖို့သာသနာ
ညောင်ရေသွန်းသည့် အစဉ်အလာကိုလေ
ရင်မှာ မြတ်တရားရယ်နှင့်
မပြတ်ပွားကာ ဆင်ခြင်ကြသည်မို့
မြင်မြင်သမျှ အလှရယ် ၀င့်ပါဘိ
အဖူးအပွင့်အငုံအစုံစုံ
အို .. လမြတ်နွေ ကဆုန်…။

     ရွှမ်းသိင်္ဃ (တနင်္သာရီ)
(၅-၅-၂၀၁၂ ကဆုန်လပြည့်နေ့  ဗုဒ္ဒနေ့  အမှတ်တရ)


Thursday 3 May 2012

မြန်မာလို လှစေဖို့















အနုဝယ် အယဉ်ဆင့်
 အမြင်မှာ တကယ်တင့်ပါဘိ 
အပင့်မျက်လွှာ အကြည့်မယ်
 ငြိတွယ်မိရပါလိမ့် 
အို.. အမိ မြန်မာမလေးရယ်..။
 ဆံထုံးနက်မှောင် ကေသာကြော့သွယ်နှင့်
 အပြုံးတစ်ချက်မောင် ကြွေရှာရော့မယ် 
ပန်းချီကဗျာ စုဖွဲ့ကြပေမယ့် 
အနုအသွဲ့ ကြွယ် လှသထက်လှသမို့ 
လက်မှိုင်လို့ ရယ်ရှုံး..။ 
နဂိုယဉ် အလှဆုံးသူတွေရယ် 
ဘယ်လိုပင် အနောက်တကြော သူတွေသို့ 
အားကျကာ မ၀တ်ချင်စမ်းပါနဲ့
 မြန်မာအလှ ကမ္ဘာပြဖို့ရာ 
ပါးပြင်မှာ သနပ်ခါးတင် ခြယ်မှုန်း 
ရင်ဖုံး မှာ ချိတ်ထဘီဆက်ပါလို့ 
အမျိုးချစ်မြန်မာမရယ်ဟု 
အိနြေ္ဒ ရွှေနှင့် မလဲနိုင်ပါဘု
 အစဉ်လာဂုဏ်ရောင်သွေးရယ်နှင့် 
 မြင်သူတကာငေး ငေးရအောင်ပါ့ 
အလှဂုဏ် မြင့်တင်ပေး။ 


 ရွှမ်းသိင်္ဃ (တနင်္သာရီ) 
(၄-၅-၂၀၁၂)






Monday 16 April 2012

သင်္ကြန်အိပ်မက် .. သင်္ကြန်ဆုတောင်း














သက္ကရာဇ်ကို ဖြို
နှစ်သစ်ကို ကြိုလိုက်ချင်ပါရဲ့
မမိုက်ဖို့ အတွေးရယ်မှာ
အဆွေး အိပ်မက်ဝယ်
ရေတစ်စက်နှင့်
ပိတောက်တစ်ခက်တောင် မချန်ခဲ့
ရှာကြံပြီး လွမ်းရပါလိမ့်
သြော်.. ဟို အတိတ်က အတာသင်္ကြန်..။

မနက်ဖန်ဆို နှစ်ဟောင်းက ဆုတ်ထွက်
နှုတ်ဆက်ပေါ့ နှစ်သစ်ဆီ
အချစ်စစ် တပွေ့တလီရယ်နှင့်
အမေ့မြန်ပြည် တကြောမှာလေဗျ
တောရော မြို့ပါ မကျန် လူသိန်းသန်းတို့
အတူ ငြိမ်းချမ်းစေဖို့ရည်
ကိန်းဂဏန်း ဗေဒင် ယတြာ မရောယှက်
စိမ်းလန်း မြေတခွင် မြန်မာ ထွန်းသစ်ဖို့
(အပေါင်းသင်း ဆွေသဟာ တို့ရေ…)
စာကဗျာ ညွန်းလျက် ဆုခြွေလိုက်ပြီ…။



ရွှမ်းသိင်္ဃ (တနင်္သာရီ)
(၁၆- ၄ - ၂၀၁၂)

(ကဗျာ ချစ်သူတို့ နှစ်သစ်မှာ အိပ်မက်လေးတွေ အကောင်ထည်ဖော်နိုင်ပါစေ..။ )

Saturday 14 April 2012

သင်္ကြန်ကဗျာ သင်္ကြန် အလွမ်း











တောင်လေ မမြူး
ပိတောက် မဖူးလည်း
စိတ်ကူးလေးနှင့် ရူးရသည်.. မြူးကြွပြီ..။

ဥသြ မတွန်ကျူး
ငုရွှေ မဖူးလည်း
တန်ခူးတေးနှင့် မြူးကြွသည် ထူးပပြီ..။

မိုးဝဠာ တင့်လျှမ်း
ဧပြီဆန်းရင်
သင်္ကြန်ကို မှန်း ....တမ်းတရသည် .. လွမ်းရပြီ..။

နေရောင် မထိုး
တိမ်မှောင် မိုးသည်း
ရွာသွန်းသည့်မိုး
သင်္ကြန်မိုးဟု .. သတ်မှတ်ရသည် မှတ်ရပြီ..။

ရွှေပြည်တော်လည်းဝေး
အပြင်ကမ္ဘာ ငေးလည်း
ရင်မှာကွယ်.. အတွေးနှင့် ..အဆွေးနှင့်...။

ကျွန်ုပ်နှင့် နှစ်သစ်ကူး
(မနှစ်ကထက်) သိပ်မထူးလည်း
စိတ်ကူးလေးနှင့် မြူးရသည်... ထူးရပြီ..။


ရွှမ်းသိင်္ဃ (တနင်္သာရီ)
(၁၄- ၄- ၂၀၁၂)
(သင်္ကြန် အကြတ်ရက် အမှတ်တရ)

(ကဗျာချစ်သူတို့ ပျော်ရွှင်ကြည်နူး မင်္ဂလာ နှစ်သစ်ကူးဖြစ်ပါစေဗျ...။

Wednesday 11 April 2012

နှစ်သစ်စိတ်ကူး













နှစ်သစ်မှာ……
လေမှာ လွှင့်ပြေး
တိမ်လွှာလေးလည်း ဖြစ်ချင်တယ်..။

နှစ်သစ်မှာ……
ဖြူစင်ပြစ်ကင်း
မြူမှုန်နှင်းလေး ဖြစ်ချင်တယ်..။

နှစ်သစ်မှာ……
စိုပြည်စိမ်းလန်း
သစ်တောတန်းလေး ဖြစ်ချင်တယ်..။

နှစ်သစ်မှာ……
သီးပင်ဝေလင်း
ရွာစိုက်ခင်းလေး ဖြစ်ချင်တယ်…။

နှစ်သစ်မှာ……
မေတ္တာရေလျဉ်
အမေ့ရင်ခွင်ထဲ ခိုလှုံချင်တယ်..။

နှစ်သစ်မှာ……
ပျော်ရွှင်လင်းထိန်
မိသားစုအိမ်ကို ပြန်သွားချင်တယ်..။

နှစ်သစ်မှာ
ငယ်ကချစ်ဖူး
အချစ်ဦးနှင့် အတူ လျှောက်လည်ချင်တယ်…။

နှစ်သစ်မှာ
ကမ္ဘာတွေပတ်လို့
ကဗျာတွေလည်း စပ်ချင်တယ်..။

နှစ်သစ်မှာ…
နှစ်သစ်မှာ….
နှစ်သစ်မှာ…
နှစ်သစ်မှာ…
နှစ်သစ်မှာ…………….
ကမ္ဘာကြီးကောင်းဖို့
မေတ္တာရေလောင်း
ကျွန်ုပ်ဆုတောင်းမယ်…။


ရွှမ်းသိင်္ဃ(တနင်္သာရီ)
(၂၀၁၂ နှစ်အကူး အမှတ်တရ)

Saturday 7 April 2012

ပိတောက်ပန်းနှင့် တစ်ယောက်သော သူ အလွမ်း















အသင်.. ပိတောက်...
ဒီတစ်ခေါက်လည်း
ဝါရွှေဖြိုးမောက်..
ကျွန်ုပ်ရှေ့ ရောက်လာ ပြန်ပြီတကား။

တစ်ယောက်ဆို တစ်သက်
ပိတောက်ဆို တစ်ခက်တဲ့
မပျက်ကွက် မေတ္တာ
ကြင်နာ မကြွင်း
အစဉ်လာ မယွင်းဘဲ..
ချစ်ခြင်း သစ္စာ သက်သေတည်ခဲ့..။

ပန်းအပြည့်ပန်ပေး
အနမ်းပေးဖူးခဲ့
အရင့် အရင် တန်ခူးမှ
ချစ်ဦးသူကို ရွယ်ရည်မှန်း
ဘယ်ဆီ လှမ်းလှမ်း
နှစ်စဉ် လွမ်းမိရပါ့တကား..။

တစ်နှစ်မှာ တစ်ရက်
တစ်ရက်မှာ တစ်မနက်ပွင့်
ရင်ပါနင့်အောင် ပိတောက်နှင့်ခိုင်း
ယှဉ်နှိုင်း ချစ်ရပေလည်း..
ပွင့်သမျှ မြေခ
ချစ်သမျှ ကြွေခဲ့ရပါ့တကား...။

ပိတောက်ကို ခူးခိုက်
ပျားတွေကိုက်သို့
ထိခိုက်ရှနာ.ဒီရင်မှာကား..
မသိမသာ တမ်း
နှစ်တိုင်း လွမ်းခဲ့...
နှစ်တွေ အလီလီဟောင်း
ရာသီတွေ ပြောင်းလဲ
ယှဉ်တွဲ ပိတောက်
ကြင်သူ တစ်ယောက်ကို
တနှစ်မှာ တခေါက်လောက်
သင်္ကြန်ချိန်ရောက်က
ပိတောက်ပင်အောက်မှာ
သူလာနိုးနိုး
တိတ်တခိုးဖြင့်
လွမ်းမိုးဆွေ
သွန်းဖြာဝေရဦးမှာပါတကား...။

အသင်.. ပိတောက်...
ဒီတစ်ခေါက်လည်း
ဝါရွှေဖြိုးမောက်..
ကျွန်ုပ်ရှေ့ ရောက်ချိန်
ခြေရာလည်းဖျောက်
ကြင်သူတစ်ယောက်သို့
နှလုံးထိုးဖောက်
အသည်း ပေါက်အောင် လွမ်းရဦးမှာပါလား..။




ရွှမ်းသိင်္ဃ (တနင်္သာရီ)
(၈-၄-၂၀၁၂)
(ပိတောက်နှင့် ပတ်သက်ပြီး ခံစားချက် ပြောပြလာသော ညီငယ် ကဗျာချစ်သူအတွက် အမှတ်တရ ရေးဖွဲ့ ခြင်းသာဖြစ်သည်...။)

အသစ်သစ်နှစ်မှာ အချစ်စစ်နှင့် ဆုံဆည်းခွင့်ရပါစေဗျ....။

Thursday 5 April 2012

သင်္ကြန်အလှ မပျက်စေဖို့















ရာသီငယ်အ၀ါရင့်ရင့်
အခါသင့် သင်္ကြန်အမီ
အညှာထက် ပွင့်ပြန်ပြီ
သင်းပျံ့ ချီ ငုရွှေပိတောက်ယှက်
နုသပြေနှင့် ရေတွေပက်ကြ
အခြေနေလစ်ရင်ဖြင့်
ဂျစ်ကားထက် ထ ထ က..
အရှက်တရားတွေ ပျက်ကျ
အလိုက်အကန်းဆိုး မသိ ပဲပေး
ဂိုဏ်ထုတ်ရှိုးမိပြန်တော့
ပိုက်စုတ်ထိုးလို့ အကုန်လှန်..။
သင်္ကြန်အလှ မဖျက်လေနဲ့
အမျိုးဂုဏ်မာန် မြန်မာများရယ်
ကမ္ဘာအလယ်တင့်ပါဘိ
အမှန်ပင် အတိမရိုးပါတဲ့
သင်္ကြန်တွင် ဒိုးပါကွဲ့
ရှိူးလိုက်လို့ ဧည့်ခံပေသင့်
သဏ္ဍာန်သရုပ်မမွဲစေဖို့
မပြတ်နွှဲရင် အားအင်ယုတ်သလိုပ
စကတ်ကွဲရင် ပျားဝင်တုပ်တတ်တာမို့
အများမြင် ရှုချစ်စဖွယ်ဖြစ်အောင်
အနုအရင့်ဝယ် အယဉ်ဆင့်လို့
ဘ၀င်တင့်စေဖို့ ရည်..
လှမျိုးနွယ်တို့ ရေ
ကကြိုးသွယ် ဂိမာန်တေးနှင့်
လူပျိုတကာ လိမ်ပြန်ငေးရအောင်
သည်သင်္ကြန်မှာလေဗျ...
အမျိုးသာသနာ မမှိန်းရအောင်
ရိုးရာပါ ဆက်ကာထိန်းလို့
အလှအပြိုင်က ယိမ်း...။



ရွှမ်းသိင်္ဃ(တနင်္သာရီ)
(၅-၄-၂၀၁၂)


ယိမ်းသမလေးတွေရေ...သင်္ကြန်တေးရုပ်သံ

Friday 30 March 2012

အသွင်ထူးတဲ့ လတန်ခူး














သင်္ကြန်မိုးတဖြောက်မှာဖြင့်
ပိတောက်တွေ ရွှေရည်လူး
ပွင့်ဖူးတဲ့ အခါမီ
ရာသီရယ် မိဿ
စိတြကြယ် တင့်ထူးတဲ့
လမြတ်ရယ် သည်တန်ခူး..။

ပြာရီမယ် ဖျော့တော့တော့နှင့်
တကျော့ကျော့
တလီလီ တချီချီ
တသီသီ တသွဲ့ သွဲ့
တလဲ့လဲ့ တလိမ်နှစ်လိမ်
နွေတိမ်ရောင် စုံညီရောယှက်ချိန်
ထုံကြည်သွန်းပက် ရေနံ့ သာနှင့်
ဆွေသဟာတို့ ပြုံးပျော်မြူး
မြန်မာ့သင်္ကြန်ဦး...။

သစ်ကိုင်း ရွက်တလျှောက်မှာဖြင့်
နှစ်တိုင်း ချစ်ပျောက်ရှာတဲ့
အစဉ်သာ နှုတ်ခွန်းချိုသပါတဲ့
ဥသြပျို အလှဖွဲ့
လွမ်းတေးတွန်သံကျူး..။

လမ်းတလျှောက်မှာဖြင့်
တူးပို့ တူးပို့ သံနှင့်
မြူးစို့ မြူးစို့ ဟန်ပြင်
အမှန်ဘ၀င်ကြည် ယိမ်းသမ အကရယ်က
သံစဉ်ညီ အသွင်ထူးပါတဲ့
သြော်.. မြန်မာ့နှစ်သစ်ကူး..။


ရွှမ်းသိင်္ဃ (တနင်္သာရီ)
(၃၁-၃-၂၀၁၂)

Tuesday 20 March 2012

တောင်ဇလပ်ချစ်သူသို့ ........ တမ်းချင်း





မြူခြေယှက်သိုင်း၊ ပြာရီမှိုင်းထင့်
ရစ်ဝိုင်းနှင်းလွှာ၊ တောင်တန်းပြာနှင့်
ညီညာသွယ်ဖြတ်၊ တောင်အထပ်တွင်
ဇလပ်နီမြန်း၊ ပွင့်သစ်ဆန်းချိန်
တင့်လျှမ်းပင်ယံ၊ တောလုံးလျှံဝေ
လက်တံဆက်တန်း၊ သစ်ခွပန်းလည်း
နှင်းဆမ်းနှင်းအောက်၊ နှင်းရည်သောက်ရင်း
မို့မောက်ဝင်းပ၊ ခက်ကိုင်းလှဝယ်
ပွင့်တိုင်းလှသည် ၊ချင်းဌာနီ။

ဇလပ်ချစ်သူ၊ ထပ်တူပြုကြည့်
ချစ်သူချစ်သက်၊ဆံနွယ်ထက်တွင်
ပန်ဆင်ဇလပ်၊ လှပေါင်းထပ်လျှင်
ထင်ဟပ်လှသွေး၊ ရှေးစက်ရေးလည်း
အတွေးပန်းချီ၊ လိုက်မမီ တည့်
စီရီညှို့ယွန်း၊ ချစ်မျက်ဝန်းနှင့်
သစ်ထွန်းချစ်မိ၊ ချစ်ခွင့်ရှိ၍
ချစ်ကြည်ညွန်းစ၊ နှုတ်ခမ်းလှထက်
ပက်ဖျန်းချစ်ရည် ၊ ချစ်ခွန်းသီ
ချစ်ပန်းပွင့်တွေ ဖူးဝေစည်။

ငယ်ကလျှောက်လှမ်း၊ ချင်းတောင်တန်းမယ်
ချစ်ပန်းစီခြယ်၊ချင်းရွာလမ်းဝယ်
ချစ်ပန်းပန်သူ၊ချင်းရွာသူကို
ကြည်ဖြူစချစ်၊ အချစ်စစ်နှင့်
ချစ်မြစ်ချစ်ပင်၊ခိုင်မြဲရှင်ဖို့
တွဲယှဉ်ချစ်ခြင်း၊ အပြစ်ကင်း၍
အောက်ချင်းပမာ၊ ဆိုသစ္စာနှင့်
ကမ္ဘာပျက်သုဉ်း၊ ဘယ်မမုန်းမို့
ချစ်ထုံးမပြယ်၊ ချစ်သက်ကြွယ်။


သို့နှယ်သို့ခါ၊ ချစ် “ချင်းရွာ”မှ
ကင်းကွာဝေလတ်၊ တောင်ဇလပ်နှင့်
မပြတ်တမ်းတ၊ သိပ်ချစ်ရသူ
ချင်းရွာသူကို၊ လွမ်းစိတ်ပိုမိ
သိုမှီးရင်မှာ၊ဆွေးမဟာနှင့်
ကမ္ဘာမခြား၊ နယ်တွေခြားလည်း
မခြားမသွေ၊ ချစ်စစ်ဝေလျက်
တွက်ရေ မှတ်ရ၊ ပြန်ဆုံကြဖို့
လွမ်းရကဗျာ၊ အလွမ်းစာဝယ်
မပြယ်မပျက်၊ အမုန်းမဖက်ဖို့
ချစ်သက်ရက်ရှည် ခိုင်မြဲတည်ရန်
ညီမျှချစ်ဖလှယ် ဆက်ချစ်မယ်…။

ရွှမ်းသိင်္ဃ (တနင်္သာရီ)
(၂၆-၁-၂၀၁၂)

(ချင်းတိုင်းရင်းသား သူငယ်ချင်း၏ ခံစားချက်အတိုင်း အမှတ်တရ ရေးဖွဲ့ ခြင်းသာဖြစ်သည်..။)


ချင်းတောင်တန်းအလှဖွဲ့ တေး

Sunday 11 March 2012

ကြယ်ရောင် မျှော်လင့်ချက်














ကောင်းကင်ကို လှမ်းတက်
ကြယ်ပွင့်ကို တစ်လုံးပြီး တစ်လုံး
ခြွေချင်သူ....။

ကောင်းကင် အောက်မှာပဲ
ကြယ် တစ်ပွင့် ပြီး တစ်ပွင့်
ကြွေကောက်ချင်သူ...။

ကောင်းကင်ကို မော်ကြည့်
ကြယ် မှိတ် တမှိတ်ကို
စိတ်ကူးနှင့် ရေချင်သူ...။

ကောင်းကင် အသင်္ချေ
မျှော်လင့်ချက်တွေ အသင်္ချေ
ကြယ်ရောင် အိပ်မက်တပွေ့ တပိုက်နှင့်
တိမ်လွှာ တိမ်စိုင်ကြား
လူးလွန့် ကချင်သူ.....။

တမိုးသားအောက်
ကြယ်တွေ ကောက်ကောက်
ကြယ်တွေ ခြွေခြွေ
ကြယ်တွေ ရေရေ
တစ်နေ့ တော့လည်း...
ကြယ်ရောင်တွေအကြား....
ပိုလင်းချင်လည်း လင်းမယ်
ပိုမှိန်ချင်လည်း မှိန်မယ်..
သေချာတာက..
မြေလွှာမှာ ခြေရာ ဖျောက်
တိမ်လွှာနောက်က
ကိုယ်တိုင် ကြယ်တစ်လုံးအဖြစ်
အငွေ့ ပျံခွင့်တော့ရှိတယ်...။


ရွှမ်းသိင်္ဃ(တနင်္သာရီ)
(၁၁- ၃-၂၀၁၂)